ថ្មីៗ​នេះ អ្នក​ប្រើ​ទូរស័ព្ទ​ទំនើប OnePlus 5 ​មួយ​ចំនួន ខល​ប្រើ​សេវា​សង្គ្រោះ​បន្ទាន់ (emergency service) នៅ​លើ​ស្មាតហ្វូន​ខ្លួន​បាន​ទេ។ នេះ​បើ​យោង​តាម​ការ​បង្ហោះ​សារ​ត្អូញត្អែរ​នៅ​លើ​គេហទំព័រ Reddit។ ម្ចាស់ OnePlus 5 ដែល​កំពុង​កាន់​ប្រើ ផ្សេង​ទៀត ក៏​បាន​លើកឡើង​ពី​បញ្ហា​ដូច​គ្នា​នេះ នៅ​លើ​ស្មាតហ្វូន​របស់​ខ្លួន​ដូច​គ្នា ថា ទូរស័ព្ទ​នឹង reboot ​ដោយ​ខ្លួន​ឯង រាល់​ពេល​ចុច​បញ្ចូល​ជាមួយ​លេខ 911 ដែល​ជា​សេវា​ emergency service។ ​

​គណនី Reddit មួយ​ឈ្មោះ Nick Morrelli ​ក៏​បាន​លើកឡើង​ដែរ​ថា បញ្ហា reboot ​កើត​មាន ក្រោយ​ពេល​គាត់​ហៅ​ចេញ​នូវ​លេខ 911 ​គោល​បំណង​រាយការណ៍​ប្រាប់​អំពី​ភ្លើង​ឆេះ​អគារ​មួយ​កន្លែង​នៅ Seattle ហើយ​អ្នក​ប្រើ​ផ្សេង​មួយ​ចំនួន ក៏​បាន​រាយការណ៍​ដូច​គ្នា​ថា OnePlus 5 របស់​ពួក​គេ មិន​អាច​ហៅ​ទៅ​កាន់​លេខ 911 ( ឬ​លេខ 999 នៅ​អង់គ្លេស) ដោយ​គ្មាន​ការ​ reboot ទូរស័ព្ទ​បាន​នោះ​ទេ។


នៅ​ក្នុង​សេចក្ដី​ថ្លែងការណ៍​មួយ​ប្រាប់​ទៅ​កាន់​គេហទំព័រ The Verge ​ក្រុមហ៊ុន OnePlus បាន​លើកឡើង​ថា ខ្លួន​កំពុង​ស្វែងរក​ដើម​ហេតុ​នៃ​បញ្ហា​កំពុង​កើត​មាន​នេះ។ “យើង​បាន​ទាក់ទង​ទៅ​កាន់​អតិថិជន​ដែល​ជួប​បញ្ហា​ដូច​នេះ ហើយ​បច្ចុប្បន្ន​កំពុង​ស្វែងរក​មូលហេតុ។ ប្រសិន​អតិថិជន​ណា មាន​បទពិសោធន៍​ស្រដៀង​គ្នា​នេះ អាច​ទាក់ទង​ប្រាប់​ខាង​ក្រុមហ៊ុន OnePlus តាម​អ៊ីមែល support@oneplus.net បាន”។

OnePlus 5 មានថាមពលថ្ម 3300mAh ខ្លាំងជាង OnePlus 3T បាន 20% ជាមួយនឹងបច្ចេកវិទ្យាសាកថ្មថ្មី ប្រើពេលកន្លះម៉ោង អាចប្រើបានពេញមួយថ្ងៃ ហើយមានកម្លាំងម៉ាស៊ីនធំជាងមុន ដោយវាប្រើនូវ Ram ទំហំ 8GB ប្រភេទ LPDDR4X និងប្រើបន្ទះឈីប Snapdragon 835 ដូចស្មាតហ្វូន Galaxy S8 និងមាន GPU Adreno 540 ហើយមានទំហំផ្ទុកឡើងដល់ 128GB ប្រភេទ UFS 2.1 បំពាក់បច្ចេកវិទ្យា Dual-lane ដំណើរការលឿនជាងធម្មតា 26%។ វាដំណើរការដោយ ប្រព័ន្ធប្រតិបត្តិការណ៍ Android 7.1.1 Nougat និងមានផ្ទៃអ៊ីនធឺហ្វេស Oxygen។ ចំពោះតម្លៃ ត្រូវបានក្រុមហ៊ុនបញ្ជាក់ថា វាខុសគ្នាតាមទំហំ Ram ដោយទំហំ 6GB និងអង្គផ្ទុកទិន្នន័យ 64GB មានតម្លៃប្រហែល​ 479 ដុល្លារ និង Ram 8GB ទំហំផ្តុក 128GB លក់ក្នុងតម្លៃ 529 ដុល្លារ៕