ភាសា​ ជា​​យាន​​​សម្រាប់​​ការ​ទំនាក់​ទំនង​ដែល​មិន​អាច​ខ្វះ​បាន ហើយ​ការ​រៀន​ភាសា​ក៏​មិន​ពិបាក​​ពេក​​ដែរ​ក្នុង​​សម័យ​អ៉ីនធើណិត​នេះ ព្រោះ​អ្នក​អាច​រៀន​បាន​គ្រប់​ពេល។ ថ្ងៃ​នេះ យើង ​​និង​ចែក​រំលែក​កម្មវិធី​​​​​​​វចនា​នុ​ក្រម​​ភាសា​​​​​​លើ​​ស្មាត​ហ្វូន​ទាំង ១០ សម្រាប់​​ជា​ជំនួយ​​បន្ថែម​លើ​ការ​សិក្សា​តាម​សៀវភៅ​​ ​និង​​អាច​ដោនឡូត​បាន​ដោយ​ឥត​គិត​ថ្លៃ​។ ​

១) ខ្មែរ-ខ្មែរ

កម្មវិធី​វចនានុក្រម​​​ខ្មែរ​​នេះ​ ត្រូវ​បាន​បង្កើត​ឡើង​ដោយ​សាកលវិទ្យាល័យ​ភូមិន្ទ​ភ្នំពេញ ក្រោម​ការ​ឧបត្ថម្ភ​​ថវិកា​​របស់​អគ្គិសនី​កម្ពុជា EDC និង​​ដក​ស្រង់​ចេញ​ពី​វចនានុក្រម​សម្ដេច​សង្ឍរាជ ជួន ណាត​ មក​បង្កើត​ជា​ App សម្រាប់​ដាក់​ឲ្យ​ប្រើ​ប្រាស់​ឥត​គិត​ថ្លៃ។

២) ខ្មែរ-អង់គ្លេស

ជា​កម្មវិធី​វចនានុក្រម​​​ខ្មែរ-អង់គ្លេស​ជំនាន់​ទី ៣​ ដែល​បង្កើត​ឡើង​ដោយ​​ក្រុមអ្នក​អភិវឌ្ឍន៍​កម្ម​វិធី​ឈ្មោះ​ Biz Solutions ដែល​មាន​បន្ថែម​មុខងារ​​ជា​ច្រើន​ និង​អាច​​​ដោនឡូត​បាន​ដោយ​​ឥត​គិត​ថ្លៃ​​ទៀត​ផង​។

៣) ខ្មែរ-បារាំង

ជា​កម្មវិធី​វចនានុក្រម​ដែល​ប្រមូល​ផ្ដុំ​ដោយ​ពាក្យ​​ពេចន៍​ជា​ភាសាបារាំង​យ៉ាង​សំបូរ​បែប ដែល​បង្កើត​ឡើង​ដោយ​​អ្នក​អភិវឌ្ឍន៍​កម្ម​វិធី​ក្នុង​ស្រុក​ដែល​មាន​​ឈ្មោះ​ថា DroidSVS។ ចំណែក Link សម្រាប់​ដោនឡូត​លើ iOS បង្កើត​ដោយ​លោក Ratanak JAI ។

៤) ខ្មែរ-កូរ៉េ

ជា​កម្មវិធី​វចនានុក្រម​​​ខ្មែរ-កូរ៉េ​​ ដែល​បង្កើត​ឡើង​ដោយ​​ក្រុមអ្នក​អភិវឌ្ឍន៍​កម្ម​វិធី​ឈ្មោះ​ Biz Solutions ដូច​ទៅ​កម្មវិធី​ខាង​លើ​ដែរ​ មាន​បន្ថែម​មុខងារ​​ជា​ច្រើន​ និង​អាច​​​ដោនឡូត​បាន​ឥត​គិត​ថ្លៃ​​ទៀត​ផង​។

៥) ខ្មែរ-ចិន

ជា​កម្មវិធី​វចនានុក្រម​ ដែល​ប្រមូល​ផ្ដុំ​ដោយ​ពាក្យ​​ជា​ច្រើន​ជា​ភាសា​ចិន មាន​ប្រែ​ជា​ភាសាខ្មែរ​​ងាយ​យល់​​សម្រាប់​​អ្នក​ទើប​ចាប់​ផ្ដើម​រៀន​ ឬ​អ្នក​ដែល​ចេះ​ស្រាប់​ហើយ​​ ហើយ​ក្នុង​នោះ​ដែរ​ក្រុម​ការងារ​បាន​ដាក់​ Link ឲ្យ​ដោ​នឡូត​ផ្សេងៗ​គ្នា ព្រោះ​មាន​អ្នក​អភិវឌ្ឍន៍​កម្មវីធី​ផ្សេង​ដែរ​គ្នា​​។​

៦) ខ្មែរ-ថៃ

ជា​កម្មវិធី​ដែល​បង្កើត​ដោយ​ក្រុម​អ្នក​អភិវឌ្ឍន៍​កម្មវិធី​មួយ​ឈ្មោះ khmer Group សម្រាប់​ដាក់​ឲ្យ​ដោនឡូត​ដោយ​​ឥត​គិត​ថ្លៃ និង​មាន​ពាក្យ​​ជា​ច្រើន​សម្រាប់​ការ​សិក្សា​កាន់​តែ​ងាយ​ស្រួល។ ចំណែក​ឯ Link សម្រាប់​ដោនឡូត​លើ iOS បង្កើត​ដោយ​លោក Titya Eng។

៧) ខ្មែរ-វៀតណាម

កម្មវិធី​វចនានុក្រម​នេះ​​​មិន​មាន​នៅ​លើ App Store នោះ​ទេ តែ​សម្រាប់​អ្នក​ប្រើ Android អាច​ដោនឡូត​បាន​ដោយ​ឥត​គិតថ្លៃ​។ កម្មវិធី​នេះ មា​ន​ពាក្យ​ពេចន៍​​មិន​សូវ​ជាសំបូរ​ទេ ប៉ុន្តែ​អាច​ប្រើ​ការ​បាន​ខ្លះ​ដែរ​។

៨) ខ្មែរ-ជប៉ុន

កម្មវិធី​នេះ ក្រុម​ការងារ​បាន​ដាក់​ link ដោនឡូត​ពីរ​ផ្សេង​គ្នា​ដោយ​ហេតុ​ថា អ្នក​អភិវឌ្ឍន៍​ផ្សេង​គ្នា​ តែ​វា​ជា​កម្មវិធី​វចនានុក្រម​ខ្មែរ-ជប៉ុន​ដូច​គ្នា ដូច​នេះ​អ្ន្កក​ទាំង​អស់​គ្នា ពេញ​ចិត្ត​មួយ​ណា អាច​ដោនឡូត​យក​មួយ​ហ្នឹង​ចុះ​។

៩) ខ្មែរ-ម៉ាឡេស៊ី

កម្មវិធី​វចនានុក្រម​នេះ មិន​​សូវ​សំបូរ​មាន​ពាក្យ​ច្រើន​នោះ​ទេ តែ​អាច​ប្រើ​ការ​បាន​ខ្លះ​ដែរ សម្រាប់​អ្នក​​ដែល​ចង់​ស្វែង​រក​ពាក្យ​ជា​ភាសា​ម៉ាឡេ។

១០) ខ្មែរ-ឡាវ

កម្មវិធី​វចនានុក្រម​នេះ ​ជា​កម្មវិធី​ដែល​មាន​​អំបូរ​តែ​មួយ​ជា​មួយ​កម្មវិធី​វចនានុក្រម​ខ្មែរ​-ម៉ាឡេ ដែរ។ ទោះ​ជា​មិន​​សូវ​សំបូរ​មាន​ពាក្យ​ច្រើន​នោះ​ទេ តែ​អាច​ប្រើ​ការ​បាន​ខ្លះ​ដែរ សម្រាប់​អ្នក​​ដែល​ចង់​ស្វែង​រក​ពាក្យ​ជា​ភាសា​ឡាវ​។

បញ្ជាក់​៖ កម្មវិធី​ទាំ​ង​នេះ ក្រុម​ការងារ​មិន​បាន​រៀប​រាប់​ពី​មុខងារ​ពិសេសៗ​របស់​វា​អស់​នៅ​ឡើយ​ ​ហើយ​អាច​ខុស​ឈ្មោះ​អ្នក​បង្កើត​ឡើង តែ​យ៉ាង​ណា​​​​ប្រិយមិត្ត​អាច​យក​ទៅ​សាក​ល្បង​ប្រើ​ដោយ​ខ្លួន​ឯង បើ​មាន​​​បញ្ហា ឬ​ចង់​បាន​កម្មវិធី​ផ្សេង​ទៀត អាច​បញ្ចេញ​មតិនៅ​ខាងក្រោម​នេះ​៕

ប្រភពពី៖Sabay News