ការ​វិវត្ត​បន្ថែម​នៅ​លើ​ប្រព័ន្ធ​ប្រតិបត្តិ iOS 11 បាន​បញ្ចូល​មុខងារ​សន្សំ​សំចៃ​ទំហំ​អង្គ​ចងចាំ​នៃ​ឧបករណ៍ បាន​ប្រសើរ​ជាង iOS 10។ ប៉ុន្តែ​អ្នក​ក៏​ត្រូវ​ដឹង​ពី​តិចនិក​និង​គន្លឹះ​ក្នុង​ការ​ប្រើប្រាស់​ឲ្យ​បាន​ត្រឹមត្រូវ បែប​នេះ Sabay នឹង​ចែករំលែក ៤ ចំណុច​ទៅ​អ្នក​រាល់​គ្នា។​

១.Offload Unused Apps:

មុខងារ​ថ្មី​លើ iOS 11 អាច​ស្វ័យប្រវត្តិ​លុប​ចោល​នូវ​កម្មវិធី-ហ្គេម ដែល​អ្នក​ពុំ​សូវ​បាន​ប្រើប្រាស់​ជា​ប្រចាំ ដើម្បី​ជួយ​ឲ្យ​អង្គ​ចងចាំ​ទំនេរ​ក្នុង​ឧបករណ៍​មាន​ការ​កើន​ឡើង។ ដោយ​លុប​ចោល​នូវ​សំបក​ផ្ទុក ប៉ុន្តែ​រាល់​ទិន្នន័យ​ទាំង​អស់​ត្រូវ​បាន​រក្សា​ទុក​បណ្ដោះអាសន្ន ហើយ​នៅ​ពេល​អ្នក​ដំឡើង​កម្មវិធី​មក​វិញ នោះ​នឹង​ដំណើរការ​ដូច​មុន​ជា​ធម្មតា។

ដើម្បី​ដំណើរការ​ចូល​ទៅ Settings > ចុច​ត្រង់ iTunes & App Store > អូស​មក​ក្រោម​បើក​ត្រង់​ពាក្យ Offload Unused Apps។​

២.HEVC Video Format:

ជា​មុខងារ​ដែល​អាច Compress ឯកសារ​វីដេអូ​ឲ្យ​ធ្លាក់​ទំហំ​ផ្ទុក​ប្រមាណ ៥០ ភាគរយ ដោយ​មុខងារ HEVC អាច​ជួយ​សន្សំ​អង្គ​ចងចាំ​បាន​ច្រើន​ជាង​ប្រភេទ​វីដេអូ h.264 ធម្មតា។ ចូល​ទៅ Settings > Camera > Formats និង​រើស​យក​ High Efficiency។​

៣.HEIF Image Format:

iOS 11 ក៏​បាន​ណែនាំ​នូវ​មុខងារ​ថ្មី​ឲ្យ​ឈ្មោះ HEIF ដែល​វា​ខុស​ពី​ទម្រង់​ឯកសារ JPEG ដោយ​នេះ​អាច​ផ្តិត​យក​រូបភាព​ក្នុង​កម្រិត​ច្បាស់​ហើយ ថែម​ទាំង​ស៊ី​អង្គ​ផ្ទុក​តិច​ទៀត​ផង។ តាម​ការ​សង្កេត​មើល​រូប​មួយ​សន្លឹក រវាង JPEG និង HEIF ទំហំ​ផ្ទុក​ខុស​គ្នា​ដល់​ទៅ ២ ដង បែប​នេះ​ដើម្បី​ដំណើរការ​សូម​ចូល​ទៅ Settings > Camera > Formats និង​រើស​យក High Efficieny (បើ​យក Most Compatible) រូបភាព​នឹង​រក្សា​ទុក​ជា JPEG។

៤.Storage Suggestion:

ជា​មុខងារ​ដែល​បង្ហាញ​ផ្លូវ​ឲ្យ​អ្នក​ប្រើប្រាស់​ក្នុង​ការ​ធ្វើ​អ្វី​មួយ នៅ​ពេល​ម៉ាស៊ីន​ជិត​ពេញ ឧទារហណ៍: ដូច​ជា​ការ​ណែនាំ​ឲ្យ​ប្រើ Offload Unsued Apps ឬ​ទៅ​លុប​រូបភាព​អ្វី​ជា​ដើម។ ដំណើរការ​មុខងារ​នេះ ក្រៅ​ពី​ធ្វើ​ឲ្យ​ម៉ាស៊ីន​លឿន​ហើយ ទៀត​សោត​ក៏​ជួយ​បើក​ផ្លូវ​សម្រាប់​អ្នក​ប្រើប្រាស់​ដែល​មិន​សូវ​ស្ទាត់​ជំនាញ​ផង​ដែរ។​
ប្រភពពី៖News.sabay.com.kh